Lea-Artibai eta Mutriku

5.642. Horretxek metroak dauzka Kaukaso mendikateko Elbrus mendiak, eta horixe izango da Marimendiren aurtengo jarduera, kideen artean ahobatez erabakita. Berton egongo dira, beste hamazortzi andregaz, Birtudes Aramaio eta Iñake Goñi ondarrutarrak.

Prestaketa egokia eta osasun kontrol guztiak eginda, datorren martitzenean irtengo dira Marimendiko kideak Moskura. Handik Mineralnye Vodira egingo dute, gero, Kabardino Balkariako Errepublika autonomora joateko.

Hurrengo egunetan, Cheguet mendi inguruetan (3.461 metro), Elbrusen magalean dauden Garabashi eski estazioan (3.750 metro) eta Pastukhov harkaitzetan (4.650 metro) egingo dute girotzea. Azken egunean 1.700 metroko maldari egin beharko diote aurre, eta horrelako altueran «gogorra» izango delakoan daude. «Eguraldi ona badago, ondo, ze lasai-lasai egingo dugu. Hotz handia badago 200 metroko pareta izoztu egiten da, eta horrek nekeztu egin dezake joana», dio Birtudes Aramaiok, bidairako ordu gutxiren faltan.

Aurreikuspenen arabera, hilaren 22an edo 23an egingo dute gailurra. Nahi, baina, Madalen Egunean dute nahien, Mont Blancen ere egun horretan ailegatu zirelako gailurrera. Eta orduan legez, helburua talde osoak gailurra zapaltzea daukate. Euren ondoan, aurreko handian legez, Mendiak eta Herriak taldeko gidari bi edukiko dituzte, mutilak, neska gidari euskaldun faltan.

Hilaren 27an buelta egingo dute Euskal Herrira.

Elbrus, Europako mendirik altuena

Itsaso Beltza eta Kaspio itsasoaren artean dago Elbrus. «Europa fisikoaren tontor entzutetsuena» da Kaukaso mendikateko sumendirik handiena. Elbrusek 5.642 metro dauzka, Mont Blancek baino 800 metro gehiago. Hartara, haren altuera handia eta egiten duen hotza izango dira aurtengo erronkan Marimendi Elkarteak gainditu beharko dituen zailtasun nagusiak. Horri, gainera, mendizale taldeak Elbrus eta inguruak ez dituela ezagutzen gehitzen zaio. «Lehenengoz goaz, eta guretzat dena da ezberdina. Badakigu elurra gogorra dena, bigunik ez daukagunik. Mutrikuar batzuk sasoi honetan joan ziren bertara, eta 20 gradu zero azpitik ibili ziren».

Zailtasunak zailtasun, aurreko prestaketa ondo eginda, gailurra egiteko asmoagaz doaz.