Lea-Artibai eta Mutriku

Ekimen bi. Horixe egingo du alturako sektoreak erregaiaren garestitzeak erangindako krisiari aurre egiteko.

Alde batetik, Arrantza Sektorearen Aldeko Plataformaren proposamenagaz bat egingo dute. Hartara, datorren barikuan flotari portura buelta egin eta amarratzeko agindua emango die.

Esanak esan, ez da geldialdi mugagabea izango, «negoziaketei» ateak ez ixte aldera. Hortaz, Madrilgo administrazioaren erantzunaren arabera jokatuko du sektoreak. «7-8 egunean Espainiako Arrantza Ministerioaren erantzuna edukitzea espero dugu», zioen atzo Bruselatik Victor Badiola OPPAOko kudeatzaileak.

Barikuan, maiatzak 30, lehorrera etortzeko agindua jasota, azkenengo itsasontziak ekainaren 4an ailegatuko dira portura.

Beste alde batetik, geldialdia hasiko den egun berean, barikuan, Madrilen (Espainia) bilduko da arrantza sektorea manifestazioan. Alturako sektorea ez eze, baxurakoa ere bertan egongo da. Horrela jakin eragin dute astean Kalare Deuna Kofradiako arduradunek. «Gasolioaren igoerak den-denean dauka eragina, eta denok joanez gero, indar handiagoa egingo du-gu», esan dute.

SOS deia, kaleetara

Protesta ekimenean gasolioaren prezioa Gizarte Segurantzako hobariagaz konpentsatzeko eskaria egiteagaz batera, inportazioen kontrola eta arrainaren lehenengo salmenta prezioa bermatzeko neurriak indarrean ipintzeko eskatuko dute. Izan ere, geldialdiak irauten duen bitartean, merkatuan topatzen den arrain zuria kanpotik ekarritakoa izango da. «Gure merkatuan arrain legal asko dago, baina beste askok ez dute betetzen gutxieneko baldintzarik, jatorria ezagutzeko momentuan». Orain, hori agerian geratuko da.

«Bizirautea gaitz dago»

Politikoei leporatu die Badiolak alturak azken urteetan bizi duen krisi egoera. Bere esanetan, Espainiako Arrantza Ministeriotik ideia gutxi atera dira, egoerari buelta emateko. Kontran, sektoreak biltzen dituen gainerako eragileen konpromisoa nabarmendu du, eta alturak aurrera egin badu, Ondarroako enpresek arduraz jokatu dutelako dela azaldu. «Familiarteko enpresak dira, eta euren enpresez gainera, euren etorkizuna eta familia askorena dago jokoan».

Gauzak horrela, egoerak ehun graduko buelta eman ezean, «arrantzak bizirautea gaitz» daukala adierazi du Badiolak. Horri lotuta, armadoreak erreserbak gastatzen ari direla aitortu du, aurrera segitu ahal izateko.