Lea-Artibai eta Mutriku

Joan den asteburuan Bizkaiko kayak-surf kontzentrazioa egin dute Mendexako Karraspio hondartzan: bariku iluntzean hasi eta domekara arte hainbat ekintza egin dituzte. Antolatzen duten bosgarren urtea izan da, eta eguraldiak askorik lagundu ez badu ere, tarteka ateri egon da, eta piraguagaz momentu onak bizitzeko aukera eman die bertan batutakoei.

Bariku iluntzean parrillada egin zuten Karraspio hondartzan: «Oso ondo joan zen guztia afaritan. Eguraldi oso ona zegoen, zerua benetan polita, eta guztira, 50 lagun inguru batu ginen», azaldu du Ainhoa Rementeriak, Dzanga Lekeitioko piraguismo taldeko kideak.

Eguraldiak okerrera egin zuen bariku iluntzean, baina zapatu goizerako ostarteak agertu ziren zeruan, eta horrek uretan ibilbidea egiteko aukera eman zuen: «Zorionez, eguraldia nahiko egonkorra izan zen zapatu goizean, eta bazkaritara arte ateri egon zen», azaldu du Ainhoa Rementeriak.

Baina arratsaldean ekaitza sartu zen, eta antolatutako ekintzak bertan behera utzi behar izan zituzten: «Monitorea prest zegoen errekako ibilbidea egiteko, oso polita izaten da gainera, baina ekaitza hasi eta bertan behera utzi behar izan genuen ekintza. Gainera, carwell eta zapatu arratsaldeko gainerako ekintzak ere ezin izan genituen egin», gaineratu du Dzangako kideak.

Ekintza ezberdinekin pozik

Zapatua amaitzeko, afaria egin zuten Emperatriz Zitan, eta 93 lagun bildu ziren: «Urtero legez, jendea gustura geratu da afariagaz. Gainera, piraguarako materialaren zozketa egin genuen, eta guztientzako egon zen zerbait», esan du Rementeriak.

Domekako egindako uretako ibilbidean 40 lagun batu ziren. «Goizean eguraldi ona egin zuen, eta ondo pasatu genuen. Jendea pozik geratzen da ekintza ezberdinak egiten ditugulako, edonork egiteko modukoak», gehitu du.