Lea-Artibai eta Mutriku

Aretorik garrantzitsuenean. Herrian. Gaztetan neguko domeka arratsaldeak pasatzen zituen lekuan... Hantxe, Goiko Zinean aurkeztuko du bihar Aitzol Aramaiok bere azkenenengo sormena: Un poco de chocolate.

Horren berri ematen dute azken egunetan pelikularen kartel koloretsuek, han-hemenka. Emanaldirako ordu gutxiren faltan, batez ere emozioa sentitzen du Aramaiok. «Ikusle guztiak ezagutuko ditut, eta gauza piloa etorriko zait burura pelikula ikusten nagoen bitartean».

Lehenengo platera, bigarrena eta postrea

20:00etan hasiko da aurkezpen ekitaldia. «Berezi-berezia izango da», arrazoi askogatik: pelikulan parte hartu duten ondarrutarrak egongo dira Bideonerako butaketan: Ugaitz Alegria, Ion Iñaki Artetxe, Begoña Anakabe, Aitor Idoeta, Xabier Idoeta eta Alexander Idoeta. Ana Elordi eta Karle Begiristain faltako dira bakarrik, lan kontuak direla eta.

Eta pantailan agertuko diren aurpegi ezagunak ez eze, Ondarroako gauza asko topatuko dituzte ikusleek. Izan ere, aitaren, amaren, izebaren, amonaren edota Txitxipotxin koadrilaren gauza asko sartu ditu ondarrutarrak tartean-tartean. «Eta pertsona horiek egongo dira bertan», dio horrek ematen duen zirrara puntuagaz.

Filmaren aurkezpenagaz hasiko da ekitaldia. Ostean, pelikulak hartuko ditu hurrengo 90 minutuak. Eta ez da hor amaituko. Argiak pizten direnean, mahai-ingururako tartea egongo da: ikusleek nahi dituzten galderak egin ahal izango dituzte; aktoreek eta zuzendariak euren aldetik, esperientziaren berri emango dute.

Lau aste Holliwoodeko ekoizpenekin lehian

Zinemetan apirilaren 30ean ematen hasi zirenetik lau aste pasatu dira. Euskal Herrian ez eze, Un po-co de chocolatek ondo-ondo funtzionatu du Espainian, Herrialde katalanetan zein Kanarietan. «Izugarrizko lorpena» da hori merkatua zelan dagoen ikusita. Eta harrera zelan doan ikusita, bosgarren bat ere posible jotzen du zuzendariak.

Besteak beste, Robert Downey Jr.en Iron Man-egaz edota Al Pacinoren 88 minutos ekoizpen handiekin lehiatu ostean, orain, Spielbergen Indiana Jones datorkio Aramaiori albora: «Maila berean lehiatzen duzu. Indiana Jones dago hor, eta zurea alboan. Zurea pixka bat jaisten denean, Indiana Jonesek sartuko dizkizu beste lau Indiana Jones», aitortzen du, barrezka.

Jendeak atera du aurrera Un poco de chocolate. Jendeari asko gustatu zaio, eta horixe da zuzendariak gehien baloratzen duena. «Emozionatuta nago jendearen erreakzioak ikusita: negarra, barrea...». Eskerrik asko esan dioenik ere egon da. Hor konturatu zen zuzendaria pelikulak hunkitu egiten zuela, eta «ahoz ahokoa» izango zela arrakastaren giltza.