Lea-Artibai eta Mutriku

«Pantalanak prest daude». Hori jakin eragin du Eusko Jaurlaritzako Portu Zuzendaritzak. Pantalanak ipini aurretik, baina, Artibai dragatuko dute, Euskal Autonomia Erkidegoko 2007-2010 Dragatze Planagaz bat etorrita.

Gaur ez bada, bihar ailegatuko da beharrak aurrera eroateko falta den tresneria: draga txiki bi.

Itsasaurreko Zubiaren ¬Calatravak egindakoa¬ eta Zubi Zaharraren artean ibiliko dira tamaina txikiko draga biak erreka hondoa garbitzen. Eta tarte horretatik ateratzen dutena Calatravaren zubiaren beste aldean ¬portu aldean¬ egongo den draga handira pasako dute. Gero, handik itsaso zabalera eroango dute, baimendutako puntu batera: zortzi miliatara. «AZTIk egin du ingurumen ikerketa, eta eurek esan digute nora bota ahal izango dugun metatutakoa».

Hondartza sasoian etenaldia

Aurreikuspenen arabera, erreka dragatzeko hiru hilabete beharko dira. Epe hori, baina, luzatu egingo da, uda tarteko dela. Izan ere, hondartza sasoian ¬ekainaren erditik irailaren amaierara arte¬ dragatzea gelditu egingo dute, legeak horrelantxerik aginduta. Hartara, iraila bukaeran edo urriaren hasieran segituko dute dragatzen, azaro bueltan amaitzeko.

Dragatzea amaituta, pantalanak ipintzen hasiko dira. Beste pare bat hilabete beharko dira horretarako.

Modu horretan amaituko dira Artibai ibaiaren ezkerreko aldean egitekoak ziren aldaketak. Orain, hilabete luzeetako beharren ostean, itxura hartzen doaz Nasa kalea, Itsasaurre eta Kafeatze. Lehengo gune bietan ia-ia amaituta daude beharrak, eta Kafeatzen, bere aldetik, azken ikutuak ematea besterik ez da falta. Hori horrela, elektrizitate kontuekin dabiltza egunotan.

Aldaketekin Itsasaurreko eta Nasa kaleko pasealekuaren jarraipena bihurtu da Kafeatze: jesarlekuak ez eze, lore ontziak ipini dituzte berton. Izena ere Kafeatze pasealekua ipini zaio.