Lea-Artibai eta Mutriku

Hamahiru gutiziaz bete da ordu batzuez Itsasaurre, «usain eta zapore goxoz», 6. Euskal Herriko Arrain Pintxo Lehiaketa tarteko.

Herenegun, 18:00etan hasi ziren «saltsan» hango eta hemengo sukaldariak, horrelako ekimenean «parte hartzeak ematen duen pozagaz». Osagaiak hara eta hona, 20:05ean aurkeztu zioten epaimahaiari azkenengo pintxoa.

Hainbat minutuan bata eta bestea probatu ostean, Barakaldoko Ines Lagas de la Peñari eman zioten epaimahaikideek garaipena izozkia oinarri hartuta prestatu zuen pintxoagatik. Eta plater irabazlea ez eze, hurrengo bi pintxo onenak zeintzuk ziren ere argi eduki zuten epaileek. Pantxo Bedialauneta izan zen epaimahaia osatu zuenetako bat, eta berak adierazi duenez, epaile guztiak bat etorri ziren lehenengo hiru pintxo aukeratzean.

Esperientzia osagairik osagai

Puntuak gora, puntuak behera, bigarren pintxorik onena ondarrutar batek prestatutakoa izan zen: oilarra oinarritzat hartuta, Aritz Urrestik egindakoa.

Epaileek hartutako erabakiaren berri eman aurretik ere, baina, igarri-igarria zen bertokoen parte-hartzea. Herriko tabernak ordezkatzen zituztenez gain, Bilbotik etorritako ondarrutarrik ere ez zen falta, plater goxoa prestatuaz «familia eta lagunak ikusteko aitzakia hartuta», Ander Agirre kasu. Horrelako lehiaketa batera aurkezten zen lehenengo aldia zuen Agirrek, eta «gogotsu jardun zuen beharrean». Legatz raviolia prestatu zuen, eta hari laguntzeko Ferran Adriak asmatutako teknikagaz, perretxiko puxtarriak.

Irabazi ala ez, guztiak zetozen bat gauza batean: «Esperientziak trukatzeko eta esperientzia irabazteko hitzordua da gaurkoa, gehien gustatzen zaiguna egiten». Iritzi bera azaldu zuten epaileek ere herenegun karpan ikusitakoaren gainean: 6. Euskal Herriko Arrain Pintxo Lehiaketa maila altukoa izan dela.