Lea-Artibai eta Mutriku

Atxukale Txirrindu Taldeak antolatutako lasterketa jokatuko da hogeita seigarrenez, etzi. Antolatzaileek jakinarazi dutenez, 100dik gora txirrindulari etortzea espero dute.

Herrian jokatuko den lasterketak junior mailako ziklistak batuko ditu. Taldeko zuzendari Benito Romerok Gipuzkoan maila horretako beste lehiarik ez egoteak parte-hartze mailan zerikusia izan duela azaldu du. «Horrekin batera, beste probintzietako taldeak animatuko balira, 120 parte-hartzaileren kopurua gainditzekotan ibiliko ginateke». Etzirako prestatu duten ibilbideak 90 kilometro ditu: Mutrikutik irten eta Osintxura egingo dute ziklistek lehenik, eta ondoren, bi aldiz igo beharko dute Kalbarioko gaina.

Osinalde gogoan

Atxukale Txirrindu Taldeak Estanis Osinalde zena gogoan eduki nahi izan du. Hori dela eta, lasterketa haren izenean egingo dute: Osinalde memoriala.

Romerok herriko alkate zenaren prestutasuna nabarmendu nahi izan du lasterketa bere omenez egiteko arrazoien artean. «Beti zegoen prest laguntzeko. Ezin bazuen aurrez abisatzen zuen, baina hurrengorako berari deitzeko esaten zigun, beti». Epaileak autoan hartuta, lasterketari jarraika ibiltzen zen Osinalde «lasterketaren antolatzaileei laguntza ederra emanez». Alkatetza bere esku egon zen denboran, sari banaketa ere beregain hartzen zuela gogoratu du Romerok. «Haren hutsunea nabarituko dugu».

Estanis Osinalderekin batera, Jabier Ezenarro mendaroarra ere gogoan edukiko du Atxukale Txirrindu Taldeak etziko lasterketan. Ezenarrok lotura handia eduki zuen txirrindularitza munduarekin orokorrean, baina Atxukale Txirrindu Taldearekin izandako harremana berezia izan zen, inondik inora. «Bere seme Jurdan ere gurekin aritu zen taldean», adierazi du Romerok.