Lea-Artibai eta Mutriku

Bertoko ontziteria osoa mantentzearen aldeko apustua egiten segitzen du LABek. Hori horrela, deslokalizazioaren aurka, Euskal Herritik kanpo ontzirik ez saltzeko eskaria egin die ontzi jabeei eta Eusko Jaurlaritzari.

Eskaria Ondarroako Intxorta SA arrantza enpresak eragindako «egoera larriari» lotuta dakar sindikatuak. Izan ere, euren berbetan, Intxorta Mendi eta Kalamendi alturako itsasontziak akziodunen eta familia eta ekonomia interesengatik daude urtebetean Ondarroako portuan amarratuta, eta «enpresaren beraren ixtea ere arrazoi berari dago lotuta».

Ondorio latzak arrantzarentzat

Intxorta SAk arrantza ontzietako bat kanpora saltzeko daukan asmoaren aurrean, kezka erakutsi du LABek, horrek Euskal Herriko arrantza sektorean eta Ondarroa lako herri batean sor ditzakeen ondorio «larriengatik». Hartara, beste portu batzuetara itsasontziak saltzeagaz batera, etorkizunerako arrantzarako lizentziak ere saltzen ari direla nabarmendu dute: «Euskal Herria arrantzarako lizentziarik eta itsasontzi barik ari da geratzen alturako arrantzan, eta itsasontzi barik eta arrantza ekintzarako errolda barik baxurako sektorean».

Horrez guztiaz gainera, «orain kanpoko portu batera saltzekoak diren ontziak» Eusko Jaurlaritzaren Arrantza Sailetik jasotako diru publikoaren laguntzagaz egindakoak direla azaldu du LABek. Eta horren harira, enpresa jabeei eta Arrantza Sailari «utzikeria» egotzi die, «erantzukizun ezagatik». Horri lotuta, Gasteizko Gobernuari daukaten erantzukizuna onartzea eskatu diote sindikatukoek «ondorio guztiekin», eta hori ez eze, arrantza flota mantentzeko behar diren bitartekoak ipintzeko, «beste industria sektore batzuetan egin duen legez».

Eskulan barik etorkizunik ez

LABen esanetan, belaunaldi berriak itsasora joatea nahi bada, lan baldintza duinak eskaini behar zaizkie. Izan ere, azken urteetan oso gutxi dira arrantzara doazen gazteak, «motibaziorik ez eta sektorearen egoera gero eta txarragoa» delako. Arrantza etorkizuneko lanbidea izateko, hortaz, «Jaurlaritzak behin-behinean hartzen dituen erabakien eta anbiguotasun politikaren aurrean», benetako arrantza politika bultzatu beharra aldarrikatzen dute, sektorearen biziraupena bultzatuko duena.

Horregaz batera, jarduera erroldak eta lizentziak herriaren esku geratzearen aldeko apustua egingo du sindikatuak, Kofradia eta OOPPak kudeatuta, bai eta komertzializazioaren aldeko programaren aldeko apustua ere.