Lea-Artibai eta Mutriku

Ligako lehen tiraldia egingo dute domekan, 12:00etan, Erandio Goikoan, Mutriku sokatira taldekoek. 680 kiloko mailan ekingo diote lur gaineko ligari.

Aurtengo denboraldian hamar mutilek osatutako taldea aurkeztuko dute herrikoek. Zortzi beterano daude tartean, baina iaztik, hiru baja garrantzitsu izan dituzte: Mikel Egaña mutrikuarrak, Ekaitz Azkoaga itziartarrak eta Lasturko Andoni Agirregabiriak taldea laga dute. Hala ere, Jabier Urresti entrenatzaileak argi dauka denboraldian egin nahi duena. «Bajak ez dira inoiz onak izaten talde baten barruan, baina gu iaz eman genuen maila bera ematen saiatuko gara». 680 eta 640 kilotan aurretik ibiltzea lortu zuten, eta gustura bukatu zuten denboraldia. «Badakigu, ordea, ez dela batere erraza izango».

Mailak erabakitzeke

Iaz bezalaxe, 680 kilotan ezezik 640 kiloko mailan ere ariko da herriko taldea. 600 kiloko mailan parte-hartzea, ordea, oraindik erabakitzeke dute.

Iaz, hiru mailatan aritu ziren. Aurten, ordea, kirolarien ezaugarriak direla-eta kolokan dago maila arinenean ariko diren edo ez. «Taldean mutil handi asko ditugu, eta pisu handietarako egokia den arren, arinetarako traba bihurtzen da. Pisuan sartzen saiatuko gara, eta lortuz gero, han izango gara».

680 kiloko tiraldian maiatzean izango dira, 640 kiloko tiraldiak, berriz, ekainean egingo dituzte.

Talde bat gehiago

Mutrikuarrek beste lau herritako tiralariekin neurtu beharko dituzte indarrak. Iazkoez gain, talde bat gehiagok eman du izena. Mutriku sokatira taldekoekin batera, Erandioko Goiherri, Laukizeko Gaztedi, Aresoko taldea, eta aurten berriro ere, Getxoko taldea ariko dira. Tarte baten ligatik kanpo egon ondoren, taldea osatu eta soka-tiran egiteari ekin diote berriro ere getxotarrek.

Talde bat gehiago edukitzea gustura hartu du Urrestik. «Zenbat eta talde gehiago egon beti izaten da hobeto. Lehia areagotu egiten da, eta tiraldiak beti izaten dira interesgarriagoak».