Lea-Artibai eta Mutriku

Uematik irteteko erabakiagaz EAJk «guztiz ulergaitza den euskararen aurkako beste pauso bat» eman duela dio Lea-Artibaiko ezker abertzaleak. Erabaki horren kontra, eta Uema bultzatzeko apustua egiten jarraitzen dutela esanez, Etxebarriko udaletxe aurrean batu ziren herenegun Lea-artibaiko ezker abertzaleko hainbat lagun.

Munitibarren eta Etxebarrian egindako azken bilkuretan Uematik irtetea erabaki zuten udalbatzek Eudelek zerbitzu berdinak eskaintzen zituela esanda. Bi herrietan EAJk agintzen du, eta beraz, erabakia EAJko buruzagien agindua dela dio ezker abertzaleak. «Aurreko legealdian EAJko buruzagitzak udaletan Uemarekin martxan zegoen erabilera plana baztertu zuen diru kuotak ez ordaintzeko agindua emanez, eta orain, bertatik irtetea erabaki du», azaldu dute.

Gainera, Eudelek zerbitzu hobea eskaintzen duela esatea aitzakia besterik ez da ezker abertzalearentzat. «Eudelen zerbitzua ematen duen Udale 2006ko amaieran sortu zen, teknikari bat dauka bakarrik udalerri guztientzako, oraingoz ez dute ezer egin eta Euskal Autonomi Erkidegoko udalentzat pentsatuta dago, eta ez udalerri euskaldunentzat», zehaztu dute.

Arlo publiko eta pribatua kontuan

Bestalde, Uemaren funtzioa zabalagoa dela diote. «1991n sortu zen Euskal Herrian euskaldunak diren herrien arteko sarea osotu eta alor guztietan euskaraz bizitzeko bitartekoak eskaintzeko helburuagaz, eta euskararen normalizazioa bai arlo publikoan eta baita pribatuan bultzatzen du». Hori guztia dela eta, Uemaren aldeko apustua egiten dute. «Herri euskaldunen sarea osatzea, euskararen lurgunea, garapen soziokulturalagaz batera, beharrezkoa da euskararen biziraupenerako, eta Uemaren funtzioa hori bideratzea da», adierazi dute.

«Beharrezkoa»

Beraz, Lea-Artibaiko ezker abertzaleak Uema moduko erakunde bat beharrezkoa dela ikusten du euskararen normalizazioaren bidean. «Tekniko bategaz euskara normalizatzea ez da behar bezelako baldintza, eta Eudelek teknikarien zerbitzua ematen du bakarrik, eta ez beste zerbitzurik», azaldu dute.

Herria da gorputza, hizkuntza bizitza, Uema aurrera pankarta eskuan, «zein da EAJk proposatzen duen bidea euskara era normalizatuan erabili ahal izateko?», galdetu dute Etxebarrian batutako Lea-Artibaiko ezker abertzaleko kideek.