Lea-Artibai eta Mutriku

Leartibai Garapen Agentziak eta Azaro Fundazioak antolatuta, Ekintzailearen Eguna jardunaldia egingo dute bihar, Markina-Xemeingo Esperanza eraikinean. Egunari «duen garrantzia» emateko asmoz, antolatzaileek atal bitan banatu dute egitaraua. Lehenengo zatia, batez ere, merkatariei zuzenduta dago; bigarrena, sortzeko, sortu berri edo finkatuta dauden enpresa guztiei zabalik egongo da.

Aurkezpenagaz hasiko dituzte ekimenak, 15:00etan. Ondoren, merkatal irudiari buruzko tailerren aurkezpena egingo dute. Merkataritza Ganberak hiru tailer antolatu ditu, eta bakoitzaren gaineko informazioa emango dute agerpenean. «Bertoko merkatariek interesa edukiz gero, tailer horiek Lea-Artibain antolatu ahal izango dira», azaldu dute.

Erakusleihoen sari banaketa

Lehenengo ataleko ekitaldiekin amaitzeko I. Lea-Artibaiko Erakusleihoen Lehiaketako sariak banatuko dituzte. 48 denda aurkeztu dira ekimenera, eta antolatzaileak pozik agertu dira parte-hartzeagaz. «Maila ona ikusi da erakusleihoetan; merkatariek interes handia jarri dute», adierazi dute .

Bost sari banatuko dituzte onenen artean: eskualde mailako onenarentzako 900 euro, bigarrenarentzako 600 euro, eta herri bikoteka banatuta, bakoitzeko 300 euro (Lekeitio/ Ispaster; Markina-Xemein/Etxebarria; Ondarroa /Berriatua).

Berbaldiak

Bigarren zatia 18:00etan hasiko da. Berbaldi bi eta V. Ideia Lehiaketaren sari banaketa izango dira atal horretako muinak. Enbor Consultores SL eta Socialwareko ordezkariek egingo dute berba. Enbor Consultoresek pertsonek enpresetan duten garrantziaz eta antolamendu eredu berrietaz jardungo du. Bestalde, Socialware enpresak eurek duten antolamendu eredua azalduko du. Jarraian, mahai-ingurua edo galdera erantzunen tartea egongo da, zalantzak argitzeko.

Ekitaldiaren bukaeran ideia lehiaketara aurkeztu diren hamahiru proiektuak aurkeztu eta sariak banatuko dituzte.