Lea-Artibai eta Mutriku

Eskubiderik ez, betebeharrik ez desobedientzia kanpainaren ekintzaileek zenbait hedabideetan agertu den informazioa gezurtatu dute, eta esandakoaren kontran, udal zergak kobratzeko enpresarik ez dagoela oraingoz kontratatuta argitu.

«Ez da egia Ondarroako Udalak Gesmunpal enpresa kontratatu duenik. Enpresakoek zein Udaleko iturriek baieztatu dutenez, ez da inolako kontrataziorik gauzatu». Ildo beretik, Udal Gestora esleipenera aurkeztu den enpresa bakarra ¬Gesmunpal¬ presionatzen ari dela salatu dute.

Gesmunpalegaz hartu-emanak

Apirilaren 10ean egin zuten berba desobedientziaren ekintzaileek Bilboko enpresako arduradunekin, eta haiek «argi eta garbi» laga zieten kontratatuak izanez gero, eurak bakarrik arlo teknikoaz arduraduko zirela, eta Felix Aranbarriren eskuetan segituko lukeela zerga arloko eskuduntzak. Era berean, Ondarroakoa eurentzat errealitate berria zela jakin eragin zien enpresak. «Komunikabideek, baina, Ondarroakoa kasu arrunt modura aurkeztu dute».

Ahultasun politikoa agerian

Azken orduetan informazio horiek guztiak azalera atera izatea Aitor Maruri alkate ohia eta herriko beste bost alderdikide EAJtik bota nahi izanaz lotzen du, zuzenean, ezker abertzaleak. Hartara, euren berbetan, «bost jelkideok alderditik behin-betiko kanporatu nahi izanak Ondarroako jelkidegoan eragin duen egonezina eta urduritasuna estali nahi izan dituzte, berriro alderdian onartuko zituztela uste zutenean». Horri lotuta, Aitor Maruriren eta gainerako alderdikideen kanporaketak suposatzen duena aztertu beharrean, «ezker abertzalearen presio eta mehatxuen erretolikan jarraitzea» leporatu die komunikabideei, «alderdiko martiriak alderditik botatzea munduko gauzarik normalena balitz modura».

Beste alde batetik, Ondarroako Udal Gestora «desobedientzia zibilaren ekimena zapaltzeko eskura dauzkan baliabide guztiak ari dela erabiltzen kritikatu dute, «jokabide horrek Gestoraren ahultasun politikoa eta estrategia gabezia agerian lagatzen baditu ere».

Zerga berdintasuna

Desobedientzia kanpaina aurrera daroatenek argi daukate «zerga arloko berdintasuna berdintasun politikoaren ondorioa» dela. Hori horrela, eta «herritarren gehiengoa eskubide zibil eta politikorik barik laga badute», logikotzat, ulergarritzat eta koherentetzat jotzen dute zergarik ez ordaintzea.

Amaitzeko, bati baino gehiagori gogorarazi nahi izan die Ondarroako udalerrian ezker abertzaleak daukan zilegitasuna ez datorkiola abstentzioa beretzat hartzetik, hauteskunde emaitzetatik baino.