Lea-Artibai eta Mutriku

Playa de Bakio ontziko tripulazioa osatzen duten 26 pertsonak atzo arratsaldean aske utzi zituztela jakinarazi zuen Espainiako Gobernuko bozeramaile Maria Teresa Fernandez de la Vegak. Espainiako armadaren Mendez Nuñez fragata ondoan duela, ontzia hurbilen dagoen porturaino eroaten dabiltzala jakinarazi zien ontziaren jabegoa duen Pevesa enpresak bahituta egon diren beharginen senitartekoei.

Negoziazioak noraino heldu diren esan ez badute ere, ontzia erreskatea ordaindu eta gero askatu dutela jakinarazi zien beharginen senitartekoei Pevesak. Albistearen aurrean, senideak pozarren agertu dira. «Orain, lasai eta pozik gaude; arnasa har dezakegu», esan zuen atzo iluntzean Iñaki Lopez Playa de Bakio itsasontziko behargin lekeitiarraren emazteak. «Informazio asko ez badugu ere, badakigu aske eta ondo daudela, eta hori nahikoa zaigu. Orain, eurak etortzeko zain gaude».

Senideek jasotako informazioaren arabera, bahituta egon diren itsasginzonak euren herrietara bueltatuko dira lehorrera ailegatu bezain pronto. «Itsasoaren erdian egon dira bahituta, eta orain, armadako fragatagaz batera, Seychelleetarantz doaz, baina horretarako bi eguneko bidaia egin behar dute, gutxi gorabehera», argitu nahi izan zuen Lopezen emazteak.

Bahiketak iraun duen bitartean, enpresak momentu guztian informazioa eman diela gaineratu zuen. «Pevesatik informazio ofiziala emateko deitzen ziguten ontziko beharginen senideoi, eta hori asko eskertzen dugu».

Zazpi eguneko bahiketa

Joan den domekan piratek Somaliako kostaldetik 250 milia ingurura bahitu zuten atun ontzi bermeotarra. Ontziko beharginak eta ontzia bera aske uztearen truke, dirua eskatzen izan dute bahitzaileek.

Espainiako Gobernuak Mendez Nuñez fragata bidali zuen Playa de Bakio ondo zegoela ikuskatzeko eta, behin negoziazioak amaituta, porturaino laguntzeko. Fragatagaz batera, egunero-egunero, hegazkin batek airetik kontrolatu du egoera.

Beste langileen familiako batzuek esandakoaren arabera, tripulazioak aske geratzeko esperantzak erakusten zituen atzotik, «gauzak uste baino hobeto zihoazelako».