Lea-Artibai eta Mutriku

Lea-Artibai eta Mutriku
2008ko azaroak 21, Barikua

Bai Euskarari

Laguntzaileak

'Un poco de chocolate' filmak harrera beroa izan du

Kultura

Getxon estreinatu dute Aitzol Aramaioren lehen pelikula luzea; Elorriagaren 'SP-rako tranbia' liburuan oinarrituta dago.

edurne burgaña

«Asko daukat eskertzeko aktoreei, baita taldeko gainerakoei ere»

Hainbat eta hainbat jende batu da Getxo Antzokian, Aitzol Aramaioren Un Poco de chocolate filmaren aurkezpenean. Unai Elorriagaren SP-rako tranbia eleberrian oinaritutako pelikula da, eta Algortako Portu Zahar inguruan grabatu dute. Aurretik Gasteizen egon da, eta aurrerago Malagako jaialdia zabaltzen.

Ekitaldiak 20:00etan hasi behar zuen. Arinago, San Nikolas plaza pelikularen aurkezpenerako agertoki naturala bihurtu zen. Izan ere, bertan dago Un poco de chocolate pelikulako Lucas protagonistak hainbat bider zapaldutako eskailera.

Alfonbra gorri eta guzti egin zuten aurkezpen ekitaldia, eta politika eta kultur munduko hainbat lagun batu zen. Getxoko alkate Imanol Landa, Ondarroako Ana Elordi aktorea eta Kirmen Uribe¬Aramaioren laguna eta idazlea¬, besteak beste. Zinemagile ondarrutarraren senide eta lagunak ere bertan zeuden.

Aktoreak eta Unai Elorriaga

Senideek eurek esan zutenez, pelikula ikusi barik zeukaten. Izan ere, atzokoa izan zen Aramaiok hainbat hiletan landutako beharra plazaratzeko momentua.

Pelikulan agertzen diren hainbat euskal aktore eta Unai Elorriaga idazlea bera ere hantxe izan ziren. Lagun artean egindako ekitaldia izan zen, eta Elorriagak berak ere halaxe esan zuen berba egitea eskatu ziotenean, Madrilen ezetz, baina lagunen aurrean lotsatu egiten zela. Txalo eta lagun arteko giroan joan zen aurkezpena.

Txalo zaparrada

Ordu eta erdi inguruko iraupena dauka pelikulak. Eta proiekzioa amaitzean, txalo zaparradagaz eskertu zioten ikusleek «denbora tarte gozoa pasarazten laguntzeagatik».

Oso harrera ona eduki zuen, eta Aramaio jendeari jaramon egiten egon zen pelilularen aurretik eta ostean. Ikusmina nagusitu zen. Ez bakarrik apropos filma ikusten joan zirenen artean, baita plaza ingurura joandako algortarren artean ere.

Emanaldiaren ostean, San Nikolas plazan jan-edanerako tartea egon zen, orkestraren musikagaz lagunduta.

Hilaren 30ean, zinema aretoetan

Algortan, Gorlizen eta Bilbo inguruan filmatu duten pelikulak Lucas izeneko 80 urteko agurearen (Hector Alterio) istorioa kontatzen du. Lucasek oroitzapenak eta errealitatea nahasten ditu, eta Shisha Pangmaren (SP) gailurrera igotzeagaz egiten du amets. Halako batean, Marcos (Daniel Brühl) ezagutuko du. Julieta Serrano, Ramon Barea, Marian Aguilera, Barbara Goenaga, Mikel Albisu eta Gorka Otxoa dira filmeko gainerako aktoreak.

Getxoko proiekzio bereziaren eta Madrilen hilaren 29an egingo den Espainiako estatu mailako estreinaldi ofizialaren ostean, Un poco de chocolate apirilaren 30ean iritsiko da zinema aretoetara.

«Asko daukat eskertzeko aktoreei, baita taldeko gainerakoei ere»

aitzol aramaio ð- Zinemagilea

Orain dela gutxira arte, bere filma ikustean emozionatu egiten zela aitortu du zinemagile ondarrutarrak.

e. burgaña

Aitzol Aramaiok (Ondarroa, 1971) atzo aurkeztu zuen Un poco de chocolate filma Getxo Antzokian. Aurkezpenaren ostean, izandako harrera aztertzeko tartea hartu zuen.

Gasteizen eguenean, Algortan orain, zelakoa da ikuslearen erantzuna?

Argiak pizten direnean ikusten da jendeak barre egiten duela, emozionatu egiten dela, eta pelikula amaitzen denean txalo eta txalo hasten da. Gero, jendeak, etorri, eta eskerrak ematen dizkit: «Eskerrik asko horrelako arratsalde eder bat ematearren, aspaldi ez nituela horrelako emozioak sentitzen». Niretzat hori kristorena da.

Gaur, gainera, etxeko giroa. Madrilen ikusiko denaren oso bestelakoa izan da?

Harritzen nauena da hain direla oinarrizko emozioak, leku guztietan funtzionatzen duela. Malagan ikusi genuen, eta asko-asko gustatu zen, eta Gasteizen eta Algortan ere bai. Berba egiten diren gaiak unibertsalak dira, eta horregatik izango da. Arazo handi bat egon arren, bitartean, ikuspuntu oso positiboa da.

Algortan ez den beste nonbait imaginatuko zenuke pelikula?

Printzipioz, Unai Elorriagak Algortan imaginatu zuen, eta nik Unaigaz ahalik eta zintzoena nahi izan dut izan, bai tonuan, baita kontatzeko eran ere. Egia esan, polita izan da: portua eta itsasoa topatu ditut. Ondarroan izan ez arren, itsasoa berdina da, eta portu bien izaera ere berdina da.

Pelikula behin eta berriro ikusita, gauza ezberdinak topatzen dizkiozu?

Orain dela gutxira arte emozionatu egiten nintzen, eta barre egiten nuen. Ni neu ere ukituta geratzen nintzen. Orain, aktoreak zelan dauden konturatzen hasi naiz. Eta asko daukat eskertzeko bai aktoreei, baita gainerako taldekoei ere. Jendeak eman duena handia izan da.

Gauza txarrak lotan eta onak loratzen utzi behar direla diozu...

Bizitzaren aurrean jarrera positiboa edukitzea. Ez du esan nahi arazorik edo sufrimendurik ez duzunik. Baina jarreragaz, ingurukoak kutsatzen dira. Horixe da pelikulagaz ere kontatu nahi dudana.

Jasotako erantzunak:

Mezua idatzi

Parte hartu | Zure mezua bidali

Parte hartzeko arauak

1. - Saiatu zure artikuluak izen-abizenekin sinatzen. Indar handiagoa du.
2. - Iritzia anonimoki eman nahi baduzu, baduzu horretarako aukera ere. Kontuan hartu ondokoak:
* Ez pertsonala. Pertsona bati buruz ari garenean zehazki, kritikatzeko edo famatzeko, anonimoek ez dute balio. Eta, kasu honetan, pertsona fisikoez ari gara, ez entitate juridikoez.
* Entitate juridikoez anonimoki aritu daiteke, baina pertsonalizatu gabe, eta talante eta errespetu onean; iraindu gabe, doako akusaziorik egin gabe... errespetuan.
* Aurreko gauza bera gai orokorrez idatzi behar denean ere.
* Norbaitek pertsonalki sinatutako iritzi bati, pertsonalki erantzutea dagokio, eta ez anonimoki.
3. - Dena arautzea ezinezkoa da, batez ere hau bezalako webgune batean. Mesedez, denon zentzu ona eta kolaborazioa eskatzen ditugu. Apenas izango den logika bezalako arautzaile zuzenik kasu hauetan.