Lea-Artibai eta Mutriku

Berriatuko udaletxe aurreko plazak X. Nekazal eta Arrain Kontserba Azoka hartuko du maiatzaren 3an. Urtero legez, eskualdeko baserritar eta kontserbagileen produktuak erosteko eta dastatzeko aukera egongo da. Berrikuntza moduan, Pantxo Bedialauneta ondarrutar sukaldariak espreski azokarako egindako pintxoez gozatzeko aukera egongo da.

Lea-Artibai Amankomunazgoak Berriatuko Udalaren laguntzagaz antolatutako azoka 10:00etatik 14:00ak bitartean egongo da zabalik, eta produktuz betetako 42 postu izango ditu. Beste batzuen artean, Idiazabal izendapeneko gazta, ahuntz eta behi gazta, ogia, euskal pastela, txokolatea, ahate produktuak, kontserba begetalak eta arrain kontserbak aurkitu ahal izango dituzte azokara joaten direnek.

Eguerdi parterantz, berriz, Berriatuko azokako erreferente bihurtu diren eskualdeko arrain kontserba eta barazkiekin egindako pintxoak jarriko dituzte azokara doazenen eskura. Iaz, 1.500 pintxo banatu zituzten, eta aurten, eguraldiak laguntzen badu, aurreko urtekoa gainditu nahi dutela esan du Jesus Mari Sarasua Lea-Artibai Amankomunazgoko lehendakariak.

Pintxo berriak aukeran

Aurten, gainera, betiko pintxoez gainera, Pantxo Bedialaunetak Nekazal eta Arrain Kontserba Azokarako asmatutakoak ere jarriko dituzte aukeran. Bestalde, apirilaren 28an, 18:00etatik 21:00etara, azokan banatuko diren pintxoen errezetak lantzeko tailerra emango du Bedialaunetak Goixalde Elkartean. Tailerra herritarrei zuzenduta dago.

Guztira, lau pintxo mota prestatuko dituzte: bat antxoagaz egindakoa eta besteak, atunagaz. Pintxoak eskuratzeko, tikeak erosi behar dira azokan jarriko duten postu baten. Tikeak euro baten erosi ahal dira, eta bakoitzagaz bi pintxo hartzeko aukera egongo da. Horretaz gainera, eskualdeko sagardoa ere probatu ahalko da. Edalontzia erosi beharko da 3 eurotan, eta edalontzi horregaz bakoitzak nahi beste sagardo edan ahalko du.

Aurtengo azoka, gainera, San Gregorio Jaiekin lotuta dago, festak azokagaz hasiko dira eta. «Nahi duen guztia gonbidatuta dago azokara eta jaietako ekintza guztietara», gonbitea egin du Imanol Mugartegi Berriatuko alkateak.