Lea-Artibai eta Mutriku

Urte osoko egitaraua prestatu dute Musika Eskolaren urteurrena ospatzeko; besteak beste, barikuan, eskolak izandako ibilbidea irudikatzen duen erakusketa zabalduko dute.

Tragotxo bat hartu eta lagunartean abesten hasten ei ziren antzina Aulestiko bizilagunak. Tabernarik taberna, musika doinuen ohiartzunak herriko eta auzuneetako kale estuak pizten zituzten. «Garai onak haiek». Herritarrek ostera, ez dute ez ahaztu musikarenganako zaletasuna, eta urterik urte, musika jorratzen jarraitu dute; tabernetan, plazetan zein etxeetan, musika presente egon da beti. Urte hauetan guztietan, denetariko kantuak abestu izan dira herrian; aulestiarrek argi utzi dute musikaren baitan bizi izan direla. Oraingoan, Zorionak zuri abestea tokatzen zaie; Musika Eskolak 25 urte bete ditu eta.

1983an hasi zen Aulestiko Musika Eskola ofizialki martxan, eta ordutik hona, herritar asko barneratu dira musikaren munduan. «Hala ere, aurretik lan asko egin zen, eta horiek ere ezin ditugu ahaztu. Musika Eskola beste ekimen batzuen fruitua da, baina hazia orain dela 25 urte baino lehenago erein zen», azaldu dute Musika Eskolako irakasleek.

Herritarren zaletasunari jarraiki, herriko eta herritarrentzako Musika Eskola sortu behar zela bururatu zitzaien guraso batzuei. «Musika ez da gutxi batzuentzat izan behar, denentzako da, eta mezu hori helarazten ahalegindu gara belaunaldiz belaunaldi».

Horri jarraituz, eskolatik pasatu diren ikasle guztiek musikagaz jolasten ikasi izan dute. «Musika gure nortasunaren zati bat dela irakatsi diegu guztiei, eta ondorioz, garrantzi handia eman diogu musikaren oinarrizko zutoinak ondo irakasteari».

Oinarriak sendotuz

Bide horretatik, musika entzuten, soinuak aditzen eta instrumentuak ezagutzen ibiltzen dira herriko umeak. Flautagaz hasi eta pianoraino, irakasleek denetariko instrumentuak irakatsi dizkiete ikasleei. «Gure helburua ez da ikasleak instrumentu bat ikastea bakarrik. Musikaren mundua ezagutzea eta ulertzea nahi dugu, eta horretarako, lehendabizi oinarri sendoa eraiki behar da; gerora aukeratuko du gustuko duen instrumentua, baina hori bigarren pausoa da».

Urteak aurrera egin ahala, Musika Eskola ere bere eskaintza zabaltzen joan da, hori bai, oinarriak baztertu gabe. Gaur egun, lau irakasle daude, eta astean bitan ematen dituzte klaseak: martitzenetan eta eguenetan. «Lehenengo orduan txikienen taldeagaz egoten gara, eta gero, nagusiagoak etortzen dira». Aurrerapenei esker, orain, ikasleek musika lantzeko tresna gehiago dauzkate. Horien artean daude ordenagailuak ere. «Musika modu entretenigarri baten ikas daitekeela uste dugu, eta horretan dihardugu».

Urte osoko ospakizunak

25. urteurrena aprobetxatuta, Musika Eskola sortu aurretiko ekimenak ere gogoan edukiko dituzte. Urte osoan urteurrena ospatzeko egingo diren ekimenetan presente egongo da gaur eguneko eskola sortu arte egindako lan gogorra.

Barikuan, herriak musikaren baitan egin dituen egitasmo guztiak irudikatzen eta biltzen dituen erakusketa zabalduko dute Udal erakusketa aretoan. Barikuan eta zapatuan, erakusketa zabalik egongo da 17:00etatik 20:00etara, eta domekan, 11:00etatik 14:30era.

Erakusketa urte osoko ospakizunen hasiera baino besterik ez da izango. Aulestiarrek eta, oro har, Aulestik, beste behin ere, argi utziko dute musika barren-barrenean daroela; herritarrek betidanik musika zainetan daroela erakutsiko dute.