Lea-Artibai eta Mutriku

Somaliako uretan piratek bahituta daukaten Bermeoko Playa de Bakio izeneko atun ontziko tripulazioaren parte dira lekeitiar bi: Iñaki Lopez eta Juan Pedro Sesma. Piratek herenegun eraso zioten ontziari, kostaldetik 250 miliara arrantzan zebilela. 26 gizoneko tripulazioa du ontziak: Galiziako zortzi, Afrikako hamahiru eta Euskal Herriko bost, tartean, Lekeitioko bi. Bahituen truke dirua besterik ez dutela nahi azaldu dute bahitzaileek. Fevasa enpresako ¬Anabac elkarteko partaidea¬ ontzia da Playa de Bakio.

Lekeitioko Udala bahitutakoen senideekin kontaktuan jarri zen atzo, eta «behar duten guztirako laguntza emateko prest» daudela azaldu zien.

Bahiketa, afalorduan

Espainiako Gobernua, Eusko Jaurlaritza eta Galiziako Gobernua ari dira atun ontzi-izozgailua askatzeko bitartekari beharrak egiten.

Bahiketa Somaliako 19:00etan ¬Euskal Herriko 21:00etan¬ gertatu zen, arrantzaleak afaltzen zeudela. Tripulazioaren egoeraren gainean zalantzak egon dira, baina patroiak RNE Espainiako irrati publikoari esan dionez, «ondo» daude.

Antza denez, itsasontziaren kontrola granada-jaurtigailu bategaz tiro egin ostean hartu zuten lau erasotzaile armatuk, baina inor ez zen zauritu. «Denok ongi gaude, eta ez dago arazorik, momentuz, ez dago arazorik», azaldu zuen kapitainak. Irratiak goizaldeko lauak laurden gutxi aldera lortu zuen ontziagaz harremanetan jartzea, baina lehendabizi bahitzaileetako batek hartu zuen berba.

Milizia bateko kideak

Somaliako milizia bateko kide direla azaldu zuen bahitzaileak, eta euren helburua bahituak askatzearen truke dirua jasotzea dela. Bahituei minik egiteko asmorik ez dutela azpimarratu zuen, eta guztia ahalik eta azkarren amaitzea nahiko luketela. «No problem, this is money» ¬ez dago arazorik, diru kontua da¬ esan zuen behin eta berriz.

Patroiak berba egin du ostean, eta ondo daudela esateaz gain, Obbira ¬Somalia ipar-ekialdera¬ daroezela uste duela agertu du.

Erasoaren ostean, itsasontziak «kalteak» izan dituela baina «goberna daitekeela» azaldu du Nekazaritza, Arrantza eta Elikadura Sailak. Atzo eguerdiko informazioen arabera, ontzia portura bidean jarrita zeukaten piratek.

Itsaso Gorrian zebilen Espainiako Armadako fragata bahiketa gertatu zen lekura bidean zen atzo.

Kasu gehiago

Ez da antzeko zerbait gertatzen den lehen aldia. 2005eko abuztuaren 3an ere, Bermeoko atun ontzi bat bahitzen saiatu ziren Somalian. Kostaldetik 170 miliatara beharrean ari zela, Playa de Aritzatxu ontzia abordatzen saiatu ziren piratak, baina ez zuten lortu, tripulazioaren erreakzio azkarrari esker.

Gertaera eman zenean, armadoreek azaldu zuten Somaliako uretako segurtasun falta handitzen doala denboragaz. «Lehen Somaliako talde armatuek kosta inguruan egiten zuten beharra, baina pirateria zabaltzen doa, eta gaur egun kostatik ehunka miliatara ere arriskua dago», azaldu zuten armadoreek.