Lea-Artibai eta Mutriku

Olatuen indarrarekin energia lortzeko energia planta 2009ko udaberrian lanean egongo da. Asmo horren berri eman zuten teknikariek herenegun, Mutriku Bizirikek antolatutako hitzaldian.

Energia plantaren inguruko informazio zabala ematea zen herenegungo hitzaldiaren helburua. Horretarako, EEEren izenean Yago Torre etorri zen, eta turbinak eraikitzen ari den Tolosako Voith Hydro enpresatik Rosa Etxeberria eta Juan Antonio Rodriguez. Gainera, babes dikearen edo hondartzaren inguruan egon zitezkeen galderei erantzuteko, Portuen Zuzendaritzako Natxo Lopez de Agileta eta Agustin Errea udal arkitektoa ere han izan ziren.

Hizlariek, energia plantari buruzko informazio zabala emateaz gain, herritarrek agertutako kezkei erantzun zieten.

Torre izan zen hitza hartu zuen lehena, eta babes dikea eraikitzeak energia planta eraiki ahal izateko aukera ezin hobea eman ziela azaldu zuen. Gainera, babes dikearen funtzio nagusiari ¬portuko sarrera babesteari¬ inolako kalterik ez diola egiten gaineratu zuen.

Energia plantaren ezarpenak olatuetatik energia sortzeko sektorean lidertza eskuratzeko bidea emango duela azpimarratu nahi izan zuen, eta horrekin batera, Mutriku mundu mailako erreferente izango dela. «Munduko hainbat lekutan energia mota horrekin interesatzen hasita daude. Aurki, Danimarkako adituek bisitatuko dute herriko planta. Teknoologia horretan aurretik joateak industriaren garapenerako aukerak gehitzen ditu, eta hasten direnei guregana jo beharra sortzen die. Horrek aukerak asko gehitzen ditu».

Hitzaldian, herrian jarriko dituzten turbinen argazkiak erakutsi zituzten. «Elementu berririk ez dago Mutrikuko plantan. Jartzeko modua da aldatu dena. Herrian jarriko diren turbinak Eskozian probatu dira. Beraz, teknologia guztiz garatuta eta hobetuta helduko da herrira», azaldu zuen Etxeberriak.

Beldurrak uxatuz

Herritarrek informazio teknikoarekin batera, planta martxan denean herritarren bizitzan izan ditzakeen eraginen gaineko kezkak azaldu zituzten.

Plantak sor ditzakeen zaraten inguruan, Etxeberriak aurrea hartu zien Zabiel Kultur Etxeko aretoa bete zuten herritarrei. Berak azaldutakoaren arabera, eraikinak berak zarata kanpora ez ateratzeko neurriak ditu, eta turbinaren gaineko alde guztia (turbinaren heren bat) zarata kontrolatzeko gailuek osatzen dute. «Olatuek dikearen aurka jotzean, dagokion zuloan jarrita dagoen turbina baino zarata gehiago aterako dute».

Horretaz gain, Torrek inguruan bizi diren bizilagunentzat inolako arriskurik ez dagoela esan zuen. «Etxean gaudenean izan dezakegun esposizio mota berberaz ari gara, nahiz eta turbinak etxeko edozein gailuren motorra baino askoz pontetzia handiagoa eduki», zehaztu zuen.

Azkenik, planta martxan dagoenean, dikean zein inguruetan aisialdiaz gozatzeko aukera guztiak egongo direla baieztatu zuten. «Herritarrentzat ere ez dago inolako arriskurik. Plantan sortzen den energia garraiatzeko sarearen osotasuna lur azpitik doa. Momentuan baimenak lortzen ari gara horretarako, hain zuzen ere».