Lea-Artibai eta Mutriku

igor romero ð- Txirrindularia

Podiumaren gorenean egon izanaren oroitzapenek irribarrea aurpegian jartzen diote Igor Romerori (Mutriku, 1986). Afizionatuetan garaipena zer den ikasita zuen arren, profesionaletan «beste zapore bat» lagatzen omen du. Orbearekin bigarren urtea besterik ez daramanean, hura dastatzeko aukera eduki du txirrindulariak.

Txapela janzteko lehen aukera eduki duzu Zornotzako udaberriko klasikan.

Lasterketarik ez dut irabazi, baina mendiko garaipena lortu dut, eta harekin batera, txapela. Txirrindulari onen artean aritu naiz, eta neure burua haiekin lehian eta haiekin podiumean ikusteak ilusio handia egin dit.

Bazenekien Zornotzan egotekoa zinela?

Tendinitis batek astebetez ia guztiz geldirik eduki ninduen, baina Llodion hasi nintzen lasterketetan parte hartzen, Indurain Sari nagusia jokatu nuen ondoren Lizarran eta taldeko teknikoek esana zidaten Zornotzara nindoala.

Nola sentitu zara lasterketetan?

Fisikoki ondo sentitzen naizen arren, erritmo falta nuela sumatu dut. Ondorioz, lehen bi lasterketak ezin izan ditut bukatu. Taldeak agindutako lanak egin izanak pozik uzten ninduen, baina pertsonalki ez nintzen oso gustura gelditzen. Hori dela eta, Zornotzara helburu garbiarekin joan nintzen: helmuga zapaldu nahi nuen.

Hori baino gehiago egin zenuen azkenean, ezta?

Taldeak beste asmo bat zeukan. Ihesaldiren bat egotekotan bertan sartzeko eskatu zidaten. Lasterketa hasi eta batera egon zen ihesaldia, eta lauko talde hartan abiatu nintzen.

Muniketa eta Autzagane aurrean. Puntuatzea al zenuen buruan?

Aurretik gindoazen guztiok saiatu ginelakoan nago. Behin lehen joanda eta mendiko puntuak eskura edukita...Hankak ondo nituela ikusi nuenez, Muniketan saiatu eta lehen pasa nintzen tontorreko karteletik. Autzaganen, berriro saiatu eta lortu egin nuen.

Mendiko maillota eskura.

Zuzendariak mendiko sailkapenean lehen nintzela esan zidanean, derrigor amaitu beharra nuen. Eta taldekideek lagunduta lortu nuen. Ez dut bolada ona pasatu, eta gauzak ilun ikusten hasita nengoen. Zornotzako klasikan lortutako garaipenak bultzada polita eman dit.