Lea-Artibai eta Mutriku

Munitibarko Udalak Uematik irtetea erabaki du. «Eudelek zerbitzu bera ematen du eta kostu barik», arrazoitu du Iker Belaustegi Munitibarko alkateak (EAJ).

Aho batez hartu zuen erabakia Udalbatzak herenegun egindako bileran. Iker Belaustegi alkateak, Mirene Bidaguren, Gaizka Jaio eta Jose Antonio Garate zinegotziek aldeko botoa eman zuten. Guztiak dira EAJ alderdikoak.

Munitibar ia sorreratik egon da Ueman: bigarren herria izan zen bertan sartzen.

EAJk hartutako erabakiaren aurrean Munitibarko EAEkoak ez daude konforme . «Urte pilo bat dira Munitibar Ueman sartu zela, eta erabakiagaz ez gaude ados. Guri esan diguten bakarra da Eudelek zerbitzu bera ematen duela eta ez dagoela zertan egon bertan», azaldu dute.

Erabaki «okerra»

Bestalde, erabakia «penagarria» begitandu zaio Jon Bollar Uemako lehendakariari. «Erabaki okerra dela iruditzen zait; batez ere, Munitibarko euskararen normalizaziorako. Herenegun bertan, euskara denon artean sustatu behar dela esan genuen, eta hori da erantzuna», adierazi du Jon Bollarrek.

Gainera, Eudelek Uemak ematen dituen zerbitzu berak ematen dituela esatea «gezurra» dela dio Uemako lehendakariak. «Eudelek Udale deitzen den zerbitzua dauka, baina, orain arte, ez dute ezer egin udalekin. Gainera, Udalen egon nahi badute ez dute zertan irten Uematik».

Euskararen normalizazioa

Bestalde, erabakia «goitik datorren agindua» dela uste du Uemako lehendakariak. «Antza, Etxebarriak ere Uematik irten nahi du. Beraz, goitik datorren agindua dute. Nahiago dute aginduak jarraitu euskara normalizatzea baino». Bide horretan Uemak egindako beharra nabarmendu du Bollarrek. «Ueman dauden herriek dituzte notarik onenak euskararen normalizazioan, eta Eudel ez da nabarmentzen euskararen alde egindako beharragatik».

Horren aurrean, Uemako zuzendaritza asteon batuko dela eta batzordean erabakiko dutela zelan jokatu jakitera eman du Bollarrek. «Albiste onak ere baditugu, Mallabia Ueman sartu da eta. Batzuek, behintzat, ganoraz heldu nahi diote euskararen normalizazioari», esan du, Uemak lanean «indartsu» jarraituko duela azpimarratuz.