Lea-Artibai eta Mutriku

Aurrekontuak egiten dabil Lekeitioko Udala, eta Eusko Alkartasunak proposamenak aurkeztu ditu. Lau zatitan banatu dituzte: proiektuak, egin beharrekoak, diru laguntzak eta zerri ematen dioten ezezkoa aurrekontuetan. «Ez diogu ezetzik esaten aurrekontuari, baina proposamen batzuk bai egiten dizkiogu», argitu dute.

Proiektuari dagokionez, zera esan dute: «Aurrekontuetan gure ildoagaz jarraitzen dugu. Hauteskundeetan aurkeztutako programaren norabidean doa. Kontua da lau urterako aurkeztu den programa ezin dela aurrekontuetan lehenengoko urtean sartu. Zatika sartu behar da. Beraz, lehentasun batzuk finkatu, eta hortik aurrera, urtero joango gara zatiak sartzen programa aurrera irten dadin».

Merkatu plaza

Merkatu plaza da EAk proposatzen duen lehenengo zatia. «Jende nagusiak ailegatzeko zailtasunak ditu eskailerak daudelako. Jende gaztea dago sartzen merkatuan, baina zaharra geratu egin da. Merkatua berriztatzeko proiektua aurrekontuetan sartzea planteatu dugu. Berriztu bakarrik ez, beste bizitza bat ematea ere bai. Badakigu irisgarritasunari aurre egiteko igogailua jartzeko asmoa daukala Udalak. Igogailuaz gain, merkatua berriztu behar dela uste dugu».

Bigarren proiektuak Eluntzetako ingurua hartzen du. «Urtetan gabiltza enpresa txikientzako eta zerbitzuentzako poligono txiki bat egiteko asmotan. Lehenengo pausoak ematea da proposatzen duguna. Ikerketa batzuk egin behar dira, eta ikusi bideragarria den edo ez. Azken finean, zer edo zer ipintzea alferrik da enpresak ez badoaz. Ikusi behar da herrian zer dagoen eta industria arloari bizitasuna eman. Ezin gara turismoagaz eta denda txikiekin geratu betirako». Parkean taberna ipintzea ere proposatu dute alderdikideek. «Tokiari bizia eman eta giro ederra sortuko luke», esan dute.

Auzoetarako irisgarritasuna

Egin beharrekoen atalean irisgarritasuna lantzen egongo da EA. «Obra handiak egin dira herrian, baina orain San Antolin, Aldamiz eta beste auzo batzuetako irisgarritasuna landu behar da. Udala auzo batzuk suspertzeko nahian dabil, eta badakigu San Antolin auzokoekin egon dela, baina guri ez digute deitu, eta beraz, ez gara egon batzarretan. Guri herritarren iritzia jakitea interesatzen zaigu. Auzoak berriztatzeagaz batera, beraz, irisgarritasuna lantzeko eskatzen dugu».

Herritarrei informazioa

Udaletxeko leihatila bakarra ere egin beharrekoen atalean sartu dute. «Askotan jendea udaletxera ailegatu eta nora joan ez dakiela ibiltzen da. Gauza txikiak gestionatzeko eta herritarrei erraztasunak emateko balioko luke. Gainera, udaletxea goizetan bakarrik dago zabalik, eta arratsaldetan ere ordu batzuetan irekita egotea ondo legoke».

Panelak ipintzea ere proposatu du EAk, herritarrei informazioa errazago ailegatzeko. «Panel informatiboa Eskolapean jarri eta edozein ekitaldiren gaineko informazioa guztientzako ikusgai egongo litzateke. Ez soilik Udalekoa, herrikoa ere bai».

Beste bi puntu sartu dituzte aurrekontuetan: «Batetik, Santa Katalinako itsasargirako pasealekuan dauden harrizko aulkiak berrizea, eta bestetik, hilerriko kapera ere berritzea».

Diru laguntzen atala da hurrengoa, eta han, LEA-ARTIBAI ETA MUTRIKUKO HITZAri laguntza ematea proposatu du alderdiak: «Orain dela legealdi bi hiru alderdiok adostu genuen biztanleko eskatutako diru laguntza ematea. Aurreko legealdian aldatu egin zen kontu hori: laguntza zuzena eman beharrean publizitate moduan sartzea pentsatu zuten. Publizitatea beti egiten den gauza da, eta guk berriro laguntzak ematea eskatzen dugu, baina eguneratuta, lehen hala adostu genuelako eta herriko informazio zuzena bertatik hartzen dugulako».

Politikariei prestakuntza ordaintzeari ezetz esan dio alderdiak. «Teknikarien formakuntza ondo ikusten dugu, eurek egiten dutelako beharra egunerokotasunean», azpimarratu dute.