Lea-Artibai eta Mutriku

Bull Terrier arrazako txakur batek emakume bati eraso egin zion Markina-Xemeingo Urbitarte auzoan, herenegun eguerdian. Markina-Xemeingo osasun etxetik Galdakaoko ospitalera eroan behar izan zuten emakumea.

Txakur biren arteko liskarra gelditzeko ahaleginean zebilela, bietako batek, eraso egin zion emakumeari. Bi besoak eta hanka bat zauritu zizkion. Erasoa gertatu eta lasterrera, Markina-Xemeingo osasun etxera eroan zuten zauritua; handik, Galdakaoko ospitalera bidali zuten.

Ertzaintza eta Markina-Xemeingo udaltzainak Urbitarte auzora joan ziren gertaeraren berri eduki zutenean, eta erasoa egin zuen txakurraren ugazabari txakurraren agiriak eskatu zizkioten. «Agiri guztiak legearen arabera zituen, baina txakurra arriskutsutzat hartuta dagoenez, lotuta eroan behar zuen ugazabak».

Aske eta muturreko barik

Izan ere, txakur biak liskarrean hasi zirenean, Bull Terrier arrazakoa aske zihoan eta legearen arabera, arraza horretako txakurrak lotuta eta muturrekoagaz eroan behar dira kalean. Zaurituak oraindik salaketarik jarri ez badu ere, Ertzaintza eta Markina-Xemeingo Udala egoera aztertzen dabiltza zer edo zer egiteko. «Ezer egin aurretik emakumearen egoera nolakoa den jakin nahi dugu», azaldu du Javier Alberdi alkateak. Bestetik, Ertzaintza ere gertatutako aztertzen dabil, emakumeari eraso egin zion txakurra aske eta muturreko barik joatea «legearen kontra» doalako.