Lea-Artibai eta Mutriku

Asteburu honetan hasiko da 2008ko Markinako Esku Pilota Txapelketa. Aurten ere, sei mailatan jokatuko da: benjamin, alebin, gaztetxo, kadete, gazte eta nagusien mailan. Finalak ekainaren 8an jokatuko dituzte.

Benjaminek A eta B mailetan banatuta jokatuko dute. Gainera, maila bakoitza talde bitan banatuta egongo da, A eta B taldeetan, eta talde bakoitzean lau bikotek jokatuko dute. Finalaurrekoetara A eta B taldeetako lehenengo biak pasatuko dira, eta elkarren aurka jokatu beharko dute. Horrela, A taldeko lehenengoak B taldeko bigarrenaren kontra jokatu beharko du, eta B taldeko lehenengoak A taldearen bigarrenaren kontra. Irabazleak finalera pasatuko dira.

Alebin mailan lau bikotek parte hartuko dute. Lehenengo gelditzen dena finalera pasatuko da zuzenean, eta finalaurrekoa bigarrenak hirugarrenaren kontra jokatuko dute.

Gaztetxoen mailari dagokionez, hemen ere bi taldetan banatuko dira, eta talde bakoitzean lau bikotek jokatuko dute. Hasieran, talde bakoitzak bere aldetik jokatuko du, eta talde bakoitzean lehenengo geratzen diren bikoteak pasatuko dira finalaurrekoetara. Finalaurrekoak A taldeko lehenengoak B taldeko bigarrenaren kontra jokatuko dituzte, eta B taldeko lehenengoak A taldeko bigarrenaren kontra.

Kadeteen maila

Alebinen mailan legez, kadeteetan ere lau bikote ibiliko dira lehian. Lehenengo geratzen dena, zuzenean pasatuko da finalera, eta finalaurrekoak bigarren eta hirugarrenen artean jokatuko dituzte.

Gazteak ere, bi taldetan banatuta egongo dira. A taldean lau bikotek jokatuko dute, eta B taldean hiruk. Talde bakoitzeko lehenengo biak helduko dira finalaurrekoetara, eta A taldeko lehenengoak B taldeko bigarrenaren kontra jokatuko du, eta alderantziz.

Azkenik, nagusien mailan, talde bitan banatuko dira, baina talde bakoitzean hiru bikotek jokatuko dute. Finalaurrekoa gazteen mailan moduan erabakiko da. A taldeko lehenengoak B taldeko bigarrenaren kontra jokatuko du, eta alderantziz.

Aurten ere, Markinako Esku Pilota Taldeko pilotariez gainera, beste herri batzuk ere gonbidatu dituzte txapelketan parte hartzera. Horrela, Areintza, Munitibar, Berriz eta Abadiñoko bikoteak ere jokoan ariko dira.