Lea-Artibai eta Mutriku

Internazionalismoa da

Apirila iritsi da, eta horregaz batera, Talatik Portalerainok gai berri bat aurkeztu du. Internazionalismoa izango da hileon gazteek landuko duten gaia. Gaur egingo dituzteTalatik Portalerainoko ekimenak, eta hilaren 25ean, Ikusi Makusikoak.

Internazionalismoa aukeratu izanaren arrazoiak eman dituzte gazte asanbladakoek: «Izan ere, Lekeition pasatzen ari dena ez da hemen bakarrik pasatzen, mundu mailan ematen den fenomeno baten ondorioa da. Toki bakoitzean hainbat ezaugarri hartzen dituen fenomenoa: kapitalismoa, hain zuzen ere».

Elkartasun eske

Kapitalismo horren aurrean, herrien arteko elkartasuna ezinbestekotzat jotzen dute gazte asanbladakoek, eta «etsai bera edukita, bakoitzak bere herritik horri aurre egitea ere bai».

Kapitalismoaren aurrean herri asko antolatu egiten direla ere gogoratu dute: «Munstro horren ondorioak herri askok jasaten dituzte, eta herri asko dira horren aurrean antolatzen direnak: Alemania, Herrialde Katalanak, Palestina, Venezuela, Mexiko, Kolonbia, Nepal eta Danimarka, besteak beste. Munduko edozein kantoietan dago borrokaren bat piztuta herritarren eskubideen defentsan».

Lehenik eta behin, beste herrien errealitatea ezagutzea oinarrizkoa dela ere gehitu dute, hurrengo eman beharreko pausoa elkartasuna dela esanda.

Tinbal poteoa

Hori horrela izanda, gaur Talatik Portaleraino ospatuko dute: 18:00etan internazionalismoari buruzko tertulia egingo dute Maite tabernan; 20:00etan tinbal poteoa, eta 22:00etan kontzertua egongo da Kabauan, Lekeitioko Nabil eta Ermuko P.A.M taldeekin.

Hurrengo ekimena hileko azken barikuan egingo dute, apirilaren 25ean. Ikusi Makusiren txanda izango da: 22:30ean, internazionalismoaren gaineko bideoa botako dute Galarrena tabernan.