Edukira joan

«Arazo politiko bati erantzuna eman beharrean, errepresioa erabiltzen dute»

isa mandiola ð- Batasunaren sumarioan auzipetua

Markina-Xemein

Aurreko sententziak ikusita, prozesuaren etorkizuna iluna izango dela uste du Mandiolak.

eider mugartegi

Batasuna sumarioan auzipetutakoen artean dago Isa Mandiola (Etxebarria, 1959). PSOEk errepresioaren alde egindako apostua luzerako izango dela dio.

2002an hasitako prozesua da. Zer deritzozu sei urtera auzipetzeari?

Uste dut ez dela bakarrik denbora kontua, balorazioa sakonagoa da. Azpikoa aztertu beharko litzateke: 2002an hartutako erabaki politiko bat betetzera dihoaz. Pertsonalki, beti da oztopo bizitza normala egiteko, beti zain zaude. Hala ere, arazo pertsonalaz haratago doa. Arazo politiko bati erantzuna eman beharrean, errepresioa erabiltzen dute.

Prozesu guzti horretatik zer espero duzu?

Prosezu honek ere, besteen moduan, helburu zehatz bat du: euskal independentiston erasoaldi errepresiboa. Gainera, PSOEk errepresioaren aldeko apostua egiten duela ikusita, luzerako izango da. Errezeta bakarra erabiltzen dute una españa grande y unida lortzeko: errepresioa. Beraz, 18/98ko sententziak ikusita, horrelako zer edo zer espero dugu. Kartzelaratzeak eman daitezke, fiskalaren zigor eskaerak handiak direla ikusita.

Alderdi politiko baten kontrako prozesuaz ari gara berbetan. Ze irakurketa egiten duzu?

Alderdi politikoen ilegalizazioa 2002an hasi zen, eta gero, hainbat ilegalizazio eman dira. Azkena EAE-ANVrena, eta ez da horretan geldituko. Duten helburu nagusia herri honen askatasun nahiak moztea da, eta horren adierazpideetako bat Batasuna izanik, zuzen-zuzen jo zuten beregana. Europan alderdien ilegalizazio kasu gutxi eman dira, Turkian eman zen bateren bat, eta horrek erakusten du Espainia ze estatu mota den. Demokrazia eza ilegalizazio, errepresio eta horrelakoetan ikusten da. Horrela, aukera bi ikusten dira. Alde batetik, konstituzioa onartzea, eta bestetik, euskaldunon erabakitzeko eskubidea. Espainiak ondo defendatzen du berea, eta aplikazioa horretan estamentu guztiak parte hartzen dute: politikoak, judizialak...

Gainerako alderdi eta herritarren jarrera zelakoa izan behar du?

Askotan esan dugun moduan, eraso horiek ezker abertzaleak zuzenean bizi baditu ere, ez dira pertsona batzuen kontrakoak, herri baten kontrako erasoak dira. Hori dela eta, herri baten moduan erantzutea garrantzitsua da. Gure epaiketa heldu aurretik Amnistiaren Aldeko Mugimenduen kontrakoa hasiko da, eta herritarrek, horrelako injustizien aurrean, inplikatu eta protestatu egin behar dute.



 


Isa Mandiola Batasuneko auzipetuen artean dago, 40 lagunekin batera

Politika

Sumarioa amaitutzat eman eta epaiketara bidaliko dituen pertsonen zerrenda kaleratu du Garzonek.

erredakzioa



Orain dela sei urte Batasunaren kontra hasitako sumarioa amaitutzat eman du Baltasar Garzon Espainiako Auzitegi Nazionaleko epaileak. Horregaz batera, epaiketara bidaliko dituen 41 lagunen zerrenda kaleratu du; euren artean dago Isabel Mandiola markinarra.

Sumarioa itxita, epaileak hamar egun eman dizkie alde guztiei Auzitegi Nazionalean euren ondorioak aurkezteko. Ordutik aurrera, Auzitegi Nazionaleko Zigor Salako 2. aretoa arduratuko da kasua epaitzeaz. Garzonek jakinarazi duenez, sumarioak milaka orri dituenez ¬800 bat liburuki¬, apurka-apurka ailega araziko dio Zigor Salako 2. aretoari. Behar horien ondorioz, badirudi epaiketa urtebete barrura arte ezin izango dela burutu.

Komunikabideen bitartez

Komunikabideen bitartez jaso du Isa Mandiolak Garzonek Batasunaren kontrako sumarioa amaitutzat eman duenaren berri. «Kasu guztietan gertatu den moduan, komunikabideek baino beranduago jasotzen dugu informazioa inplikatuok», adierazi du Mandiolak. Komunikabideetan agertu dena baino gehiago ez dakiela azpimarratu du.

Sei urte

Sumarioa 2002ko abuztuaren 20an hasi zen, eta 2005eko urtarrilaren 25ean eman zuen Garzonek orain epaiketa bidean jarri duen 35/02 sumarioko lehenengo autoa. Herriko tabernen bidez ETA diruz hornitzea egotzi zien auzipetuei, eta hori argudiatuta, ETAko kidetzat jo zituen. Lehenengo auto horren barruan 36 lagun inputatu zituen, euren artean, Isa Mandiola markinarra. Gero, beste auto bi zabaldu zituen, eta azkenean, 41 lagun auzipetu ditu epaileak. Auzipetuen artean, urte luzeetan ezker abertzaleko buruzagi izandakoak daude. Gainera, euretako batzuk kartzela zigorra betetzen daude.

Auzipetze horrek, inondik inora izaera juridikorik ez duela eta bakar-bakarrik izaera politikoa duela azaleratu zuen orduan Batasunak. Gainera, hori gizarteratzeko hainbat ekimen egin ziren Lea-Artibai eta Mutrikun.





 

zabaldu.com
bildu.net
digg.com
del.icio.us

Jasotako erantzunak:

Mezua idatzi

Parte hartu | Zure mezua bidali

:

:

:

:

Spambotak ekiditeko irudia
:

Parte hartzeko arauak

  1. 1. - Saiatu zure artikuluak izen-abizenekin sinatzen. Indar handiagoa du.
  2. 2. - Iritzia anonimoki eman nahi baduzu, baduzu horretarako aukera ere. Kontuan hartu ondokoak:
    * Ez pertsonala. Pertsona bati buruz ari garenean zehazki, kritikatzeko edo famatzeko, anonimoek ez dute balio. Eta, kasu honetan, pertsona fisikoez ari gara, ez entitate juridikoez.
    * Entitate juridikoez anonimoki aritu daiteke, baina pertsonalizatu gabe, eta talante eta errespetu onean; iraindu gabe, doako akusaziorik egin gabe... errespetuan.
    * Aurreko gauza bera gai orokorrez idatzi behar denean ere.
    * Norbaitek pertsonalki sinatutako iritzi bati, pertsonalki erantzutea dagokio, eta ez anonimoki.
  3. 3. - Dena arautzea ezinezkoa da, batez ere hau bezalako webgune batean. Mesedez, denon zentzu ona eta kolaborazioa eskatzen ditugu. Apenas izango den logika bezalako arautzaile zuzenik kasu hauetan.

© 11barri S.L. - Xemein etorbidea 19, 48270 - MARKINA-XEMEIN - Tel.: 946168202
Faxa: 946168219 - E-posta:

Internet Ehuntzen S.L.-k garatua

11barri S.L.