Lea-Artibai eta Mutriku

Baikor bezain itxaropentsu amaitu du Artedrama Euskal Laborategiak Aulestin hirugarren aldiz egin dituen topatekak. Herritarrak ez ezik, antzezlanak ikustera kanpotik ere jende asko joan dela eta, pozarren dago antolakuntza bai egindako lanagaz, baita jasotako erantzunagaz ere.

Joan den eguenean hasi zen III. Artedrama Euskal Laborategia martxan. Ordutik hona, kanpora begira egindako lanez gain, barne prestakuntzan ere gogor ekin diote ikasle eta irakasleek euren eguneroko jardunari. «Klaseetan leku bateko eta besteko irakasleak izan ditugu, eta horrek asko aberastu gaitu. Ikasleen eta irakasleen artean, sekulako komunikazioa egon da, eta horrek gogotsu lan egiteko giroa sortu du», esan du Ander Lipus aktoreak.

Ikuslegoaren erantzuna

Aulestiarrek ez eze, inguruko jendeak asko lagundu diela eta giroa pizterakoan ezinbesteko beharra egin dutela aitortu du Lipusek. «Aretoak txiki geratu dira egindako ikuskizun gehienetan, eta hori oso pozgarria izan da».

Zapatuan bertan, esate baterako, Erregea eta Bufoia ikuskizuna eskaini zuten Andoni Egañak eta Ander Lipusek, eta Josu Goikoetxeak gai jartzaile lanak egin zituen. Aretoa bete-beteta egon zen, eta bertan batu zirenek bi orduko saio komikoaz gozatzeko aukera izan zuten. Domekan, Deja Bu panpin laborategiaren Gizona ez da txoria antzezlanak ere jendetza erakarri zuen Aulestiko udal areto nagusira.

Oro har, formakuntza aldetik edizio aberasgarria izan dela argitu du aktore markinarrak. «Aulestiko topaketa horiek finkatzea lortu dugu».

Orain, egunetan puntako ikuskizunak eta klaseak eduki ostean, aurrera begira jarri da antolakuntza: «Euskal kulturgintza aurrera ateratzen jarraitzeko deszentralizazioa bultzatuko dugu hemendik aurrera».