Lea-Artibai eta Mutriku

Markinako Esku Pilota Taldeak Berria Txapelketako finala jokatuko du zapatuan, Hernanin. Joan den zapatuan Munitibarren jokatu zituzten finalaurrekoetan lortu zuen pasea, Uharteri kadete eta gazteetan irabazi ondoren. Orain, Galdakaori irabazi beharko dio txapela eskuratzeko.

Markinako kadeteek ez zuten partida ondo hasi. 10 eta 4 galtzen hasi ziren, baina gero, Uharteko Bendoiro eta Minaren nekea aprobetxatuta, partidari buelta ematea lortu zuten. Horrela, 22 eta 11 irabazi zuten Arrieta eta Aretxabaletak. Gazte mailan, ostera, hasieratik nagusi izan ziren bertokoak. Perez eta Etxeberriak partida handia jokatu zuten, eta erraz irabazi zieten Kortabarria eta Garciari. Azken emaitza 22 eta 7koa izan zen, markinarren alde.

Sailkatuta

Kadeteen eta gazteen partidak irabazita, Markinak eskuratuta zeukan jadanik finalerako pasea. Seniorretan, gainera, Uharteko bikotea zen faborito, eta espero modu- an, bertokoak baino gehiago izan ziren Yoldi eta Lizoain, Uharteko bikotea. Hala ere, Urberuaga eta Kastillok hasiera eskasa izan bazuten ere, hobetzen joan ziren partida aurrera joan ahala, eta polito jokatu zuten amaierarantz. Dena dela, Uhartek 22 eta 8 irabazi zien Markinako Esku Pilota Taldeko bikoteari.

Txapelaren bila

Markinako Taldeak lehenengoz parte hartzen du Berria Txapelketan, eta hasieran espero ez bazuten ere, finalera arte heldu dira. Galdakaoren kontrako finala zapatuan, 16:30ean, jokatuko dute Hernanin, eta garaipena saila izango den arren, aukera guztiak zabalik daudela uste dute bertokoek. «Finala irabaztea gaitz ikusten dugu, baina final batean edozer pasa daiteke», adierazi du Serafin Ibarra Markinako Esku Pilota Taldeko arduradunak.

Taldea dena ematera joango dela ere aurreratu du Ibarrak. «Kadeteen mailako partida gurea izan daiteke, eta nagusietan eurak dira faborito, hala ere, gu txapelaren bila joango gara», azpimarratu du Markinako Taldeko arduradunak, finalera arte heltzea ere, taldearentzat asko izan dela aitortzeagaz batera.

Autobusa Hernanira

Esku pilota zaleek bete-bete egin zuten Munitibarko frontoia zapatuan. Bertoko zaleez gainera, Nafarroatik etorritakoak ere asko izan ziren, eta giro aparta sortu zen. Bertokoek zapatuan jasotako animo guzti horiek finalera arte eroateko, autobusa antolatu du Markinako Esku Pilota Taldeak. Autobusak 15:00etan irtengo du Markina-Xemeindik, eta partida ikusi ostean, sagardotegira joango dira afaltzera. Autobusean joan nahi duenak eguenera arteko epea dauka Kain edo Iruroken izena emateko.