Lea-Artibai eta Mutriku

Lea Artibaiko Garapen Agentziak eskualdeko erakusleihoen lehiaketa antolatu du aurten, estreinako. Erakusleihoek urte osoan duten garrantzia azpimarratu nahi dute udaberri-uda aldera egingo den ekimenagaz. Bidatz Basterretxeak, (Ondarroa, 1981) Lea Artibaiko Garapen Agentziako arduradunak, gogo handiz kolpe dio proiektu berriari.

Ze helburugaz antolatu duzue eskualdeko erakusleiho lehiaketa?

Erakusleihoa kanpora begira dagoen leihoa da, barruan dagoena erakusten duena eta saltzen lagunduko duen mezua eraikitzen duena. Beraz, erakusleihoak duen garrantziaz ohartuta, gure helburua sormena martxan ipini eta dendetako erakusleihoek urte guztian garrantzia eduki dezatela da. Urtero, abenduan, Bilboko Merkataritza Ganberak Bizkaiko erakusleiho lehiaketa antolatzen du, beraz, guk udaberri-uda aldean indartu nahi dugu ekimena.

Zeinek parte hartu dezake lehiaketa horretan?

Lea Artibain erakusleihoa duten denda guztiek, beti ere, epe barruan izena emanez gero. Hiru data izan behar dituzte kontuan: izena ematekoa, martxoaren 3tik 31ra; erakusketa aldia, apirilaren 1etik 15era, eta saria emango den eguna, maiatzaren 8a.

Zer baloratuko da?

Erakusleiho bakoitzak bere nortasuna izango du, eta ziur nago, bat baino gehiago izango direla liluratuta utziko gaituztenak. Baina lehiaketa bat da, beraz, baloratzeko irizpide batzuk ipini behar ditugu. Beraz, apainketa proiektu bakoitza originala izateaz gain, beste irizpide hauek ere baloratuko dira: produktua merkaturatzeko egokitasuna eta produktuaren aurkezpena; sormena; argiztapena; modernitatea eta berrikuntza eta irudi komertziala.

Eta, zeintzuk izango dira sariak?

Eskualdeko sari bi banatuko ditugu. Lehenengo saria 900 euro eta publizitatea izango dira, eta bigarrena 600 euro. Horretaz gainera, herrika ere 300 eurko saria banatuko dugu. Honela banatu ditugu herriak: Ondarroa eta Berriatua, Markina-Xemein eta Etxebarria, eta, Lekeitio eta Ispaster.

Non eman behar dute izena parte hartu nahi dutenek?

Mailing bat egin dugu lehiaketaren berri emateko, eta bidalitako orrian informazioa izateaz gainera, izena emateko aukera ere badaukate. Orri horretan bete behar dituzte datuak, eta gero, gure bulegoetako baten entregatu. Bestalde, eskutitzik jaso ez badute, baina erakusleiho lehiaketan parte hartu nahi badute, edo informazio gehiago nahi, gure bulegoatera etor daitezke.

Non daude zuen bulegoak?

Markina-Xemeinen, Xemein Etorbidea 12an; Ondarroan, Kantoipe kalea 3an, eta Lekeition, Sabino Arana Etorbidea 14an. Telefonoz deitu nahi izanez gero: Markina-Xemeingoa, 946169172 da; Ondarroakoa, 946833495, eta Lekeitiokoa, 946034111. Datuak emailez ere bidal daitezke bbasterretxea@leartik.com helbidera.