Lea-Artibai eta Mutriku

Bidearen ezaugarriak eta uda sasoian trafikoaren handitzea kontutan hartuta, Udalak derrigorrezko norabide bakarra ezarri du hondartzara bidean. Seinaleak jarrita daude, eta gidariei errepidean bezalaxe errespetatzea eskatzen diete.

Zumalabetik jeisten diren autoek, beraz, kofradia berri aldera ez badoaz behintzat, hondartzaraino joateko ez dute inolako arazorik. Kontrako norabidea debekatuta dago. Hondartzatik atera nahi dutenek, beraz, tunelak pasa eta kamino berritik atera beharko dute. Tuneletatik datozenek, berriz, behin Burumendira helduta aurrera egiterik ez dute izango. Izan ere, norantza horretan datozen autoek debekatuta dute bigarren tunelean barrena igerilekura heltzea.
Aparkatzeko lekuari dagokionean, hondartza inguruko gunea urtero bezala antolatuko da: zabalgunearen parez dauden tokiez gain, Burumendin aparkatu ahal izango da.

Debekua denentzako
Seinaleak jarrita dauden arren, gidari asko dira errespetatzen ez dituztenak, eta horrek arrisku egoerak sortu ere egin ditu. Zorionez, ez da zauriturik egon.
Duela aste batzuk zabalgunean zeuden zenbait herritar arrisku egoera horietako baten lekuko izan ziren. «Nahiz eta debekatuta egon, tunelean behera zetorren autoak ia bizikletan zihoan mutiko bat jo zuen. Mutikoak ez zuen inor espero norantza horretan eta lasai zioan. Gainera, autoak aparkatuta daudenez ez da ondo ikusten».
Bestalde, bizikletan dabiltzenek ere seinaleak errespetatu behar dituztela azpimarratu dute udaltzainek, eta abiadurarekin kontuz ibilitzeko gomendatu diete. Izan ere, abiadura handian portura jeisteagatik mutiko bat zaurituta suertatu zen duela aste batzuk. «Zerbait gurutzatu zitzaion bidean, eta hura ekiditzeko, harri tartera joan zen. Beste ezer egiteko astirik ez zuen izan».
Sorosleek bizikletan ibiltzeko kaskoa jantzita ibiltzearen komenigarritasuna nabarmendu nahi izan dute. «Aurkako karrilean sartuta, eta abiadura handian etortzeagatik ia anbulantziaren aurka talka egin duenik ere egon da. Gazteei erantzukizunez jokatzea, eta gutxienez kaskoa jantzita ibiltzea eskatzen diegu».